Kontseilua, nora zoaz? Tiraka

14/03/2006 GMT 1

Kontseilua, nora zoaz?

tirakablogger @ 09:03

Kontseiluak ere uste du eremu judizialetik egiten ari diren jazarpena Euskal Herria beste egoera politiko batean kokatu nahi duten guztien aurkako erasoa dela. Horren harira idazki bat sinatu du, besteak beste, EA, Batasuna, Aralar, AB, ELA, LAB, EHNE, Kontseilua, AEK, Etxerat, Askatasuna, Segi eta Bilgune Feministarekin batera. Gogora dezagun Kontseiluaren eginkizun nagusia: “Euskararen normalizazio prozesua areagotzea”. Euskararen normalizazioa dio, ez politikarena. 22 eragile horien artean hauteskundeetan parte hartzen duten alderdi politiko nagusiak falta dira (PNV, UPN, UPM, PSF, PSOE, PP, IU eta beste hainbat); hau da: euskal gizartearen %85a. Zilegia al da Kontseiluaren izena zerrenda horretan agertzea?

Eragileen Idazki horrek dioena da: “Beste behin ere Madrileko Auzitegi Nazionalak eskubide zibil eta politikoen kontrako eraso berri bat burutu asmotan kokatu du bere burua” Kontseiluak, ordea, ez du bere burua agertu ETAk azken garai honetan behin eta berriro jarri dituen lehergailuen kontra, nahiz eta nabarmen diren eskubide zibilen kontrakoak.

Nik ere modu pertsonalean bat egiten dut idazki horrekin. Kontseilua, ordea, Euskal Herri osoko herritarren hizkuntza eskubideen alde egiteko sortutako erakundea da, ez eskubide zibil edo politikoen alde egiteko jaiotakoa, arlo hori katramilatsua baita oso. Jarrera hauekin bere jarduera ildoa guztiz lerratzen du Kontseiluak eremu jakin batean, beste eremu batzuetatik alde eginez. Eta horrek, neurri handi batez, bere zilegitasun soziala eta plurala kendu egiten dio.

Zabaldu Bildu.net |

del.icio.us

Erantzunak

Erantzunak(8) »

Zilegi da, guztiz, Kontseiluak eraso horien aurrean salaketa publikoa egitea.
Zilegi da erasoak salatzea soilik gizarte-atal jakin bateko kide edo erakundeei egiten zaizkienean. Nork bere laguntxoak defendatzen ditu aurrena.
Jarrera horrek Kontseiluaren balizko aniztasunaz zalantza handiak eragiten dituela? Jakina.
Baina zilegi du Kontseiluak alderdi jakin bati lotuta agertu nahi izatea ere.
Mikel | 1999-11-30 - 00:00:00 GMT 1 #
Jakina! Era berean, zilegia al da \"Euskaldunon Egunkaria\"ren itxieraren aurrean kalera ateratzera eta mutu gelditzea \"Egin\" edo \"Ardi Beltza\" kasuetan? Zilegia al da Elkarlaneanekin elkartasuna adieraztea eta Jarrai, Haika eta Segiri ez? Zilegia al da AEKk jasan zuen jazarpen judizialagatik Euskal Herri osoa kriminalizatu nahi dutela adieraztea eta gero Zumalabe Fundazioa eta enparauak bazter batean uztea.

Behingoz, uste dut Kontseiluaren jokabidea zilegia dela. Politikoki \"zuzena\" ez da izango, diru-laguntzak eskuratzea agian oztopatuko du baina zilegia bada.
Anónimo | 1999-11-30 - 00:00:00 GMT 1 #
Ni ez nator bat inondik inora Kontseiluak egin duenarekin. Espainiako Auzitegi Nazionalean gertatzen dena salatzea ez da bere zeregina.
Unai | 1999-11-30 - 00:00:00 GMT 1 #
Zilegi, zilegi? zer da zilegi? Baten batek gogoan dauka zer zen zilegi frankismoan? Nik bai.

Zergatik ez duten idazki hau PNVk, PSFk, PSNk, PSEk, IUk eta beste hainbatek da galdera, eta ez, zergatik sinatu duen Kontseiluak.
Anónimo | 1999-11-30 - 00:00:00 GMT 1 #
Neuk be ez dot ukatuten Kontseiluaren jarreraren zilegitasuna. Baña baten batek lehentxoago esan dauan legetxe, Kontseiluak utzi egin beharko deutso mundu guztiaren izenean dabilen euskararen defendatzaile izateari. Esan gura dot horregaz, Kontseiluak eskubide osoa daukola Batasunaren atal bihurtuteko, eta, egon ere, seguru nago lan bikaina egingo leukeela. Zehaztu egin beharko dau arlo hori. Momentu honetan bere jarrera sektarioak nahikotxo desligitimatu dau danon izenean arituteko aurrerantzean.

Sentiduten dot. Hor goian baten batzuk txarto jokatu dabe, edo baten batzuk beste guztien izenean jokatu da euren baimen barik. Horrek ondorioak daukoz, edo azalpen zehatzen bat beharko dau.
Jon | 1999-11-30 - 00:00:00 GMT 1 #
\"Behingoz, uste dut Kontseiluaren jokabidea zilegia dela. Politikoki \"zuzena\" ez da izango, diru-laguntzak eskuratzea agian oztopatuko du baina zilegia bada.\"

Horixe, bada. Zilegia dela, baina pardidista ere bai. Hau da, Jonek esan duen bezalaxe, Kontseiluak argitu beharko du Batasunaren adar bat den, edo agian ez du zertan argitu, baina itxura, horren itxura guztia du.
Politikoki zuzena zer den eta zer ez den, segun eta nondik begiratzen zaion, noski, zuzentzaile zorrotzik ez baita falta ezker-eskuinetan.
Eta bukatzeko, Kontseiluak ez zuen bada hasieratik esan, dirulaguntza publikoei uko egingo ziela \"independentzia gordetze aldera\"?
Hortaz?
Anónimo | 1999-11-30 - 00:00:00 GMT 1 #
Kontseiluaren jarduna ez dut baloratuko hemen, gune hau beste zerbaitetarako zela uste baitnuen. Blog hau JAurlaritzan euskararen erabilera areagotzeko xedea duen gunetzat nuen, baina beste guztiek egiten dutena aztertu (kritikatu)beharrean, kasu honetan Kontseiluarena, noizbait etxe barruko lanei erreparatzen hasten zaretenean sinistuko dut hori. Noiz hasi behar duzue Jaurlaritzako normalizazio egitasmoak aztertzen? Tiraka egin nahi baduzue behintzat!
xare | 1999-11-30 - 00:00:00 GMT 1 #
Kontseiluaren zilegitasunaz ari zarete eta partidista omen dela Batasunarekin lerratzeagatik... Barkatu baina testuan bertan ez al du jartzen testua ere EAk, Aralarrek eta ABk ere sinatu zutela? Hala guzti horiek ere Batasuna al dira? Eta euskal gizartearen %85a hortik kanpo dagoela...Zergatik? Bozkatzne duen partidua bertan ez dagoelako? eta sindikatuen gehiengoa egonda esan nahi du euskal gizartearen %50ak baino gehiago bat egiten duela? Mesedez nahikoa helduak gara jakiteko alderdi bati botoa emateak ez duela esan nahi alderdiaren gauza guztiekin bat egiten duzunik!
enea | 1999-11-30 - 00:00:00 GMT 1 #

Tiraka
Administrazioan euskara erabiltzeko

14/03/2006 GMT 1